Gunnar Sigurðsson prófessor við beinþéttnimælitæki sem sýnir ástand beina. Hollt mataræði er grundvöllurinn að góðri heilsu og tryggir okkur rétt næringarefni. Kalk er eitt þeirra efna sem líkamann má alls ekki skorta. Auðveldast er að fá kalk úr mjólk* og mjólkurvörum. Eitt mjólkur-glas, dós af jógúrt eða skyri innihalda svipað magn af kalki, eða ríflega 200 mg. Ostur (26%) á eina brauð-sneið eða dós af kotasælu veita minna kalkmagn en þó ríflega 100 mg. Þá má ekki gleymast að D-vítamín er nauðsynlegt fyrir kalkbúskap líkamans. Líkaminn framleiðir D-vítamín með hjálp sólarljóss, en flestum er ráðlagt að taka lýsi eða fjölvítamín, einkum að vetrarlagi, til að tryggja sér D-vítamín. Regluleg hreyfing og uppbyggilegar æfingar styrkja beinin líkt og aðra lifandi vefi líkamans. Mikilvægt er líka að greina vandamálið í tíma. Beinþéttnimæling er einföld og sársaukalaus rannsókn sem sýnir ástand beina þinna á augabragði. Þú færð upplýsingar um beinþéttnimælingu á næstu heilsugæslustöð. Ef í óefni er komið má sem betur fer hægja á beinþynningu með réttum aðgerðum.